2012年6月6日星期三

壹盤生意 好搵 小食店 搞 加盟 殺出血路

上午8:37    No comments


每次記者訪問壹盤生意的老闆，都會問他們一個問題：「未來有什麼發展方向？」
十個受訪者中，有八個會雄心壯志答道：「搞加盟店囉！」
而這八個聲稱要搞加盟的老闆，當中六個又會無下文。
本刊從過去訪問過的《壹盤生意》中，找到兩盤落實做特許經營的生意。一盤是四個月前才開業、日賣一千五百杯珍珠奶茶，月賺近廿萬的元朗台式飲品店「臺北站」。其第一間加盟店終於在上週一開幕，還有四間在洽談中。而另一間，是兩年前接受訪問，月賺十萬的串燒檔串皇，其「加盟店」亦於上星期開張，但因加盟者臨時縮沙，被迫淪為分店。兩盤生意的老闆親身體驗，俱異口同聲說：「搞加盟真係唔易o架！」

臺北站粉嶺店開業首日，已賣出一千五百杯珍珠奶茶，排隊人潮更令管理公司要向他們送上小禮物──欄杆，令人客盡量貼近店鋪，避免阻塞通道。此情此景，不論總店老闆Benson（左）還是加盟者阿Sam（右），均飲得杯落。
位於粉嶺名都中心的臺北站，於上週一開幕，踏入中午十二時，開始出現人龍，長期有廿多位客人在門外等候。由於人流太多，更要管理公司拿出欄杆維持秩序。來粉嶺教游水的Thomas，見到這新店便立即停下腳步：「我飲過元朗總店的珍珠奶茶，覺得好好飲，見新鋪開張，即刻買番杯。」
這間珍珠奶茶店，無論裝修、食物質素及價錢，都參照今年四月才於元朗開業的「總壇」。四位只有二十五歲的老闆陳秉笙（Benson）、陳秉中（阿中）、劉鎮宗（Jones）及郭理原（Gino），收取五十萬元加盟費，替三十多歲的Sam及Samuel開店，估計扣除四十二萬等開鋪開支，四個老闆淨袋八萬，其後每個月再收取百分之五營業額。
通宵做宣傳品
看似好搵，但四位老闆卻異口同聲說：「真係辛苦錢」。上週一開鋪後，四人未敢怠慢。事關他們向Sam及Samuel預期短期內可日賣一千七百杯，因此開張當日四出做宣傳，並帶着數名員工，到商場附近的當眼處將廿個易拉架掛上，派免費試飲。第一天這加盟店已賣出了一千五百杯，營業額一萬六千元。「不過個客認為第一日生意都唔夠理想，當日凌晨兩點九打俾我哋講，覺得宣傳唔夠，咁我哋即時返屯門office，通宵幫佢哋設計做多一批易拉架、banner同傳單，一早拎去快印，到而家都未瞓過。」上週二下午，四位老闆之一的Benson撐着一對熊貓眼說。
開鋪前，四位老闆已所有事情跟到足，包括隔日到新鋪視察裝修進度、為店內所需之機器如封模機、雪櫃、果糖機等格至抵價，並處理供應商入貨，更要通宵為新鋪作預備及檢討，實質像自己開了一間分店：「多嘢做到連自己間鋪都無時間理呀。」
四子更發現打錯算盤，Benson表示：「我哋最初預裝修費十五萬，點知原來呢個商場設有指定承辦商，一塊用帆布整的招牌，市價幾百蚊，但佢哋收八千蚊；鐵閘市價萬幾蚊，指定承辦商收三萬幾，而家裝修費都最少廿萬。」
簽定合約　保障自己
現在有三十多個投資者希望做臺北站的加盟店，不過已落實的就只有兩家。而加盟店開張後，他們會從元朗旗艦店抽調兩位高級店務員到新鋪工作一個月，確保流程順暢。Benson表示：「我哋會同加盟者睇鋪，一齊盤算個鋪值唔值租，並先計算人流及目標顧客人數，將目標顧客人數的四分一當作顧客來推算營業額，再將營業額減租金及成本，如果條數計得掂，個鋪就可以租。」
他們亦訂好與加盟者的合約，但由於他們盡信由律師行替他們擬定的合約，故未有細看合約便電郵予阿Sam，出現了多條「騎呢」條款。當中包括：「加盟者加盟後，要將全副精神放於生意上」、「假如加盟店日後有員工、顧客私自出去開鋪，可以追究加盟者。」這些條文辣得來亦難以執行，最後雙方決定修改並刪除不合理條款，然後動筆簽約，合約期三年，此後臺北站會以成本價提供食材予加盟者，而日常營運如人手調配亦會提供意見。
初步合作，阿Sam及Samuel對臺北站四子的幹勁十分欣賞，但認為仍有改善之處，Sam指：「我開出五十萬支票予臺北站後，收據只寫上加盟費一個項目，佢哋唔寫清楚各個項目細節同價錢，我扣唔到稅o架嘛！」截至本週日，臺北站營業額已有十一萬。
特許經營變分店
同樣總店在元朗的串燒檔「串皇」，其「加盟店」同樣在七月中正式開張。開業九年的「串皇」，月賺十萬，不時收到陌生人致電，查詢老闆會否批出特許經營。但老闆趙柏高（Wingo）擔心這班陌生人會打爛其金漆招牌，所以一直未有考慮。到今年中，他在十多年前教書時認識的舊學生阿勳、Martin和阿輝都年屆三十，想創一番事業，因此向Wingo提出做串皇的特許經營店。Wingo與他們老友鬼鬼，決定大開中門。
這次Wingo坐言起行，不消一星期，已找到在大埔翠屏商場、面向巴士總站的地鋪開業。「小本經營梗係搵二、三線地區，起碼唔使『責』住一大筆錢做按金，旺角、太子地區按金閒閒哋都要廿萬，呢度兩個月按金、一個月上期，只需九萬元。」他還出盡「牙力」向業主爭取六年的長約，假如結業亦只需一個月通知。第二個星期，他已處理好裝修出牌及請人事宜。為了這間「加盟店」，他還情商經營餐館的哥哥，借出屯門工場存貨及醃製食物，甚至借用其貨車送貨。這幾個星期，他先後三、四次與加盟者阿勳、Martin和阿輝開會，計過數後，他們每人只需夾十五萬元開業，扣除開支，他可淨袋十萬元。

就在萬事俱備，開始草擬合約及「科水」合資時，阿勳、Martin和阿輝才醒覺「殺到埋身」，由於他們缺乏積蓄要靠父母幫忙，這時父母及老婆才紛紛前來睇鋪，你一言我一語，有些嫌非一級地段及非旺鋪位，其中還有親戚出動睇風水，最終三人齊齊臨陣退縮。由於事前沒有簽約，又已租了鋪，因此Wingo最後只有無奈把「加盟店」變成串皇的分店。
Wingo自稱無怨恨，又表示體諒學生「身不由己」：「今次洗濕咗個頭，焗住玩落去啦！個鋪有信心賺錢嘅，但係違背咗我之前嘅大計同諗法啫！」不過串皇分店以七月的淡季而言，每日平均賣一千串串燒，營業額貼近萬元，Wingo笑言九月踏入旺季會更和味。阿勳和Martin來探班時，不諱言有點後悔，他們更向串皇表示想再接手，今趟Wingo表明要白紙黑紙簽約：「之前係多咗啲感情分，自己亦無咁謹慎，下次再做一定會小心。」

（廖健昌攝）

大部分向臺北站申請加盟的投資者，都是被其元朗總店外所聚集的人潮吸引。（林志謙攝）

炸薯系列佔粉嶺店生意額兩成。售價$20

臺北站每個月均會推出五款新產品，圖為八月份的主打新產品，冰淇淋紅茶。售價$12

開業首日，員工仍未熟習各飲品沖調的配方，曾出現一杯飲品沖錯三次的情況。（廖健昌攝）

加盟店開幕前，臺北站總店老闆會向新員工提供訓練，包括教導售票、沖飲品到煮薯仔。（關永浩攝）

串皇新店一開即賺，分店鄰近巴士站，放工時段尤其多人前來幫襯。（廖健昌攝）

這款串燒雞皮，每串賣五元，毛利率達九成。

阿勳（左一）和Martin（右一）起初以為俾錢加盟就可以印印腳做老闆，所有事情均依靠Wingo（中）一腳踢，最後更因對全盤生意欠缺了解，令家人缺乏信心，不願投資。（林志謙攝）

是次合作雖然失敗，不過他們三人仍保持友好關係，只是與阿輝卻愈見疏離，整個訪問從未見阿輝露面，Wingo笑言：「可能佢唔好意思面對我啦！」阿勳的太太（右一），對加盟事宜一直表示支持。（林志謙攝）

0 留言:

發佈留言

訂閱： 發佈留言 (Atom)