o靚模 揸fit人 月賺 百萬

o靚模熱爆動漫節，過去一星期，佔據新聞娛樂頭條的，不是十三歲少男熊抱人形攬枕，就是o靚模咪眼嘟嘴豪歎冰凍雪糕，衞道之士口誅筆伐，只是為這個瞄準高消費宅男的新興市場，火上加油。
人人瞄準o靚模這隻「超級金蛋」。打造周秀娜成為o靚模女王的金牌搞手鄺君賢，單計大賣的寫真集及出位精品，月賺百萬，冠絕同行。

「我唔鍾意影明星，日日睇電視都見到，無咩特別，o靚模唔同，有樣有身材呀，個個二十五歲以下先至好！」四十歲的「龍友」梁先生，去年開始迷上影o靚模，今年動漫節、書展出現「o靚模群星會」，不惜請假「追o靚」，帶備「長短火」入場，一時把鏡頭由少女腿部向上「低炒」，一時又對正o靚模纖腰胸部，拍了過千張相片，人氣o靚模周秀娜、Lavina、Rainbow、Kama等，全部成為他的「囊中物」，他更不諱言每晚睡前都要看幾遍，「我老婆唔理，影相啫，佢管唔到咁多。」他說。
o靚模亦成功虜獲一眾電車男的心，戴紅色cap帽的周先生，背囊袋住一筒周秀娜三點式bikini趴地poster，上週五一見周秀娜出場，立即不理危險爬上圍欄大聲呼叫：「Chrissie！我鍾意周秀娜，個個行開。」他說自從看了周秀娜火辣寫真後，已奉她為女神，他的願望，就是「希望將來女朋友似佢咁靚咁好身材！」

金牌經理人
憑食雪糕同刷牙的挑逗造型出位的周秀娜，成為動漫人氣最強，七百個人形攬枕，搶購一空，成為全港電車男恩物，周秀娜大賺一筆買新樓，而打造她的模特兒公司「環球狂熱」，更加一戰成名，揸fit人鄺君賢（Roy），飲得杯落，「啲貨咁好賣我哋都好意外，我哋唔係要挑戰大眾嘅道德底線，邊有咁高深呀老友，純粹一盤生意，我哋做過市場調查，性感包裝嘅年輕靚女，喜愛上網同動畫嘅宅男最鍾意。」
記者計過，以阿Roy旗下最賺錢的周秀娜為例，寫真集訂價九十八元，短短一星期連印兩版，售出三萬一千本，攬枕及 T恤分別售出七百個及一千件，單計精品，只一個書展及動漫展，營業額便高達七百多萬元，以每名簽約model抽佣三至五成計算，扣除印刷、宣傳及場租等費用，阿Roy短短一個月，已月入過百萬，非常和味。
而他旗下o靚模的身價亦三級跳，曾拍廣告、但知名度稍遜的「八模」，書展前每人出一個騷平均收三至四千，現時就跳升到貼近二萬；而走勢甚勁的周秀娜，更由一萬升至四萬，泳衣及內衣騷更要八萬元先有得傾。

身價三級跳
食住個勢，阿Roy週一更新開了o靚模網站，專門出品性感o靚模攬枕及 T恤，稍後再推周秀娜「成名作」食雪糕和刷牙的鎖匙扣，送貨點還擴大至內地及台灣，擺明車馬要搶攻中港台三地數以萬計龐大的宅男市場，更打算接拍o靚模電影，真是氣勢如虹。
阿Roy這名o靚模揸fit人，之前在英皇娛樂做了十二年，捧紅過不少藝人，包括Twins和容祖兒，她用包裝明星的伎倆，套用在o靚模身上，但成本卻低好多，「我喺英皇做咗十幾年，知道個市場要點玩。傳統打造一個青年人偶像，未成名都好，要有助手、保母車、專人set頭同化妝，買粒糖都要助手買，開支好大，但最攞命係，依家唱片根本無人買。我見過一個靚仔，佢話唔敢買CD，因為怕俾人笑傻仔！我真係睇唔到前景，所以跳出嚟搞o靚模，平好多，可以自己搭地鐵，唔使助手，連化妝set頭都可以自己搞埋。」
結果，去年七月，阿Roy與三個朋友合組環球狂熱，每人打本十幾萬，擺名車馬搶攻o靚模市場。撞正金融海嘯，各大商業機構減縮開支，「肯搏又平」的o靚模大受歡迎，衞道之士以至網上反o靚模大聯盟的種種抗議，只是為這個新興市場火上加油。
「Chrissie（周秀娜）係我第一個簽嘅model，老早預咗要將佢包裝得性感，引起市場注意。但係只有佢一個唔夠，今年三月，我見咗二百六十幾個o靚模，簽咗其中八個出八模寫真， 賣青春，一出八個，有氣勢啲！加上暑假係黃金檔期，最好佢哋個個一夜成名，有咗身價，接job就可以得心應手。」他說。
食髓知味，阿Roy直言下一站會對準宅女，希望打造「男o靚模」，「依家見咗三、四十人，全部未掂，唔係太man就係完全思想空洞，無個人魅力，難搵過o靚模好多。」他笑說。

捧紅龍友女神
阿Roy靠周秀娜起家，他的對手、旗下擁有美味天使Lavina及Rainbow等o靚模的張達鴻（Admond），亦趁勢大搞，更拍了新力碼頭，合作出版發行一萬三千本《夏之盛放》寫真，市場大賣，又安排o靚模替新力PS3的網上遊戲出任「image girl」，賺取知名度，身價由以前一個騷一千元，升至一萬，急升十倍！
Edmond的o靚模能夠彈出，原來全靠龍友支持。廿八歲的他，中五畢業後做過兼職模特兒，曾被日本音樂教父小室哲哉選中做web DJ，後因為小室擱置計畫，做唔成星，後來轉做IT人，三年前兼營龍友網站，做龍友及模特兒的中間人，其門如市，造就他成為最年輕的龍友模特兒經理人，「有次無聊上討論區，見到有龍友猛呻，話約啲model出嚟影相成日失場，著啲衫又唔啱，個樣唔靚，怨氣沖天；我以前做過兼職model，識得啲女仔，佢哋話有job都唔敢接，擔心遇到龍友色魔，我覺得既然有供有求，不如自己搞個網站，做中間人抽佣。」

Admond表示，龍友之中，既有家境不俗的雙失青年，也有退休專業人士，他見過有人帶埋菲傭服侍自己影o靚模，「香港至少有幾十個影會，閒閒哋過千人，佢哋消費力高，鍾意網上分享靚女相，在網絡上一傳十、十傳百，Rainbow我都係因為好多龍友搵，所以先簽佢。」
Lavina及Rainbow都是龍友界早已成名的「星」，做了o靚模更街知巷聞，除了新力上門找她們宣傳遊戲，二人亦上過無綫《美女廚房》做美少女廚神，「而家我哋為o靚模搞活動，龍友都會帶埋長短火嚟影，主辦單位見到咁多人影相，就算明知佢哋唔係記者，都會好高興，啲龍友又影到靚相，一家便宜兩家着。」Admond說，「動漫之後仲有電腦展同遊戲展，預計o靚模應該仲可以hit多半年。好多o靚模問我可以做幾耐，有啲公司為咗氹你簽約，話你咁後生，玩多十年都仲得，我就絕對唔敢咁講，呢一行，邊講得埋？」

o靚模拍鹹片
根據著名模特兒網站「MoteStation」統計，香港目前至少有八百名靚模，要突圍一點不容易，為了成名，今年二十四歲的o靚模Chloe，加入now903成人極品台，拍成人電視劇。
五呎半高、擁有34C身材的Chloe，年多前入行當全職模特兒，連龍友「私影會」都做，「試過有啲龍友call我出嚟影相唔俾錢，有次仲離譜，個龍友影影吓忽然話好hot，叫我除衫，我唔理佢，結果佢走入廁所解決。」為求出位突圍，她最後選擇拍鹹片搏一搏，即使零片酬也不介意，「我唔會露點，剩係著住內衣褲周圍走。佢哋想train我成為個台的代言人喎！如果真係做到，我都成咗名咯！咪可以再接其他job囉！」now903成人極品台創作總監Mac指出，招募會當日有百多個模特兒面試，與近日o靚模熱有關，「自從周秀娜同班賣肉o靚模出現後，底線全部降晒，有啲仲話唔介意露點演出！」

大學生o靚模
於動漫節穿tube top、短裙的二十一歲的o靚模Shanshu，是浸會大學一年級會計系學生，她三年前做part-time model，每月賺六千至一萬交學費及家用。去年經濟差，一個月都無job，直至今個盛夏，性感o靚模熱起，帶動她這類少女model多了廣告接，但就要露肉賣性感，她說：「連普通喺酒店搞電腦產品發布會，都要著bikini，我試接過一個job，講明唔著bikini，去到先話唔著無得做，有啲客話著得保守，只係露腰、手仔腳仔，人工會低啲。」面臨o靚模搶job威脅，Shanshu近月簽了模特兒公司幫她接job，但由於堅持不肯性感，一個鐘只賺三百至五百元，「我做o靚模只為賺學費，唔係搵食，你叫我唧胸升level，一定唔會。」

動漫節週二閉幕，有參展商埋怨旺丁不旺財，打造周秀娜成為o靚模女王的金牌搞手鄺君賢，憑出位攬枕大賺，愈鬧愈紅。

周秀娜憑食雪糕和刷牙的挑逗造型成功出位，惹來衞道之士口誅筆伐，阿Roy直言只是市場策略，道德族的批評，早在計算之中。

挾o靚模潮乘勝追擊，阿Roy火速於週一開全新o靚模網站狂銷美女精品，送貨點擴大至內地及台灣，擴大戰區。

阿Roy（黃圈）在英皇十二年，幫手捧紅過不少藝人，包括Twins和容祖兒，他謂傳統娛樂公司的造星方程式成本過高，不及又平又肯搏的o靚模回報率高。

鄺君賢（右）與林偉漢（左）都是英皇老臣，瞄準o靚模市場自組公司打天下，頭炮力推廿四歲超齡「o靚模」周秀娜行性感搶灘，吸引全城目光。

由龍友網站搞手，上位成為o靚模界金牌經理人，Admond（中）旗下的Lavina（右二）及Rainbow（右一），在龍友界是早已成名的「星」，屬第一代浮上地面的網絡o靚模。

書展後緊接的是動漫節，連日在會展「站台」的Lavina（中）疲態畢露，下午五時才與Admond「食早餐」醫肚，全程苦口苦面，與台上騷手弄姿判若兩人。

Chloe為了成名，即使沒有薪金，也願意加入成人電視劇拍攝行列。

兩名浸大女生Jennifer（左）、Shanshu（右）加入o靚模行列，堅持傳統模特兒風格，不會賣弄性感出位。